Afþreying

Þessi fallegi salur við smábátahöfnina er staðsettur í Bláa húsinu hjá Rauðku. Hann er nýttur til ýmissa viðburða en á sumrin eru þar meðal annars listasýningar í gangi.

Alla Sigga er lendsþekkt fyrir skemmtilega lifandi trélistaverk sín sem prýða meðal annars Icelandair hótelin. Vinnustofa Öllu Siggu er staðsett í gamla Alþýðuhúsinu.

Í Herhúsið sækja listamenn allstaðar að úr heiminum þar sem þeir koma og búa meðal íbúa Siglufjarðar og skapa list sýna. Í lok dvalar sýna þeir síðan afrakstur sköpunar sinnar.

Listamaðurinn Fríða er sá frumkvöðull sem dreif af stað verkefnið Héðinsfjarðartrefilinn sem tengdi bæjarkjarna Ólafsfjarðar og Siglufjarðar. Vinnustofan er skemmtilega fjölbreytt og lífleg.

Í Sjálfsbjörgu kennir ýmissa grasa og er þar unnið með gler, leir, postulín og fleira. Fjöldi listamanna kemur þar saman og nýtur góðra stunda við iðju sína.

Hjá Abbý eru sérlega skemmtilegir og mjög fjölbreyttir munir en listamaðurinn hefur lagt stund á marga listina gegnum tíðina.

Gallerí Sigló er skemmtileg vinnustofa þar sem sérlega fallegir postulínsmunir eru unnir fyrir framan gesti og gangandi.

Ljóðasetur Íslands á sér enga hliðstæðu á landinu og býður gestum færi á að glugga í ljóðabækur og upplifa lifandi viðburði.

Þjóðlagasetrið er lifandi og skemmtilegt safn með íslenskum þjóðlögum þar sem gestir geta skoðað muni og myndbönd með kveðskap, söng og hljóðfæraleik.

Síldarminjasafnið er eitt stærsta sjóminja- og iðnaðarsafn landsins og er hýst í þremur ólíkum húsum þar sem gestir kynnast síldveiðum og vinnslu á silfri hafsins.

Frá Siglufirði liggja margar skemmtilegar gönguleiðir í mörgum erfiðleikastigum. Eldhugar finna hér glæsilegan fjallahring með óborganglegt útsýni meðan þeir sem vilja léttari göngu geta gengið í Hvanneyrarskál eða innanbæjar.

Við smábátahöfnina á Siglufirði er hægt að fara í strandblak sem vinsælt er að spila meðal heimamanna. Strandblakvöllurinn er opinn frá byrjun júní og út ágúst.

Minigolf er ávalt vinsælt hjá ungum sem öldnum. Minigolfvöllur er staðsettur við hlið Kaffi Rauðku við smábátahöfnina en þar gefst fólki kostur á að spreyta sig í minigolfi að kostnaðarlausu.

Smábátahöfnin iðar af lífi allt árið um kring og þá sérstaklega á sumrin. Þar geta ferðalangar dorgað fyrir fiski ásamt því að fylgjast með, spjallað við og jafnvel aðstoðaa smábátasjómenn við löndun á afla dagsins.

Tvær sundlaugar eru í Fjallabygg, útilaug á Ólafsfirði og innilaug á Siglufirði. Á Ólafsfirði er skemmtileg laug fyrir fjölskyldur með rennibrautum. Á báðum stöðum eru heitir pottar.

Á Siglufirði er í dag níu holu golfvöllur en í uppbyggingu er nýr níu holu golfvöllur sem tilbúinn verður sumarið 2015 jafnt og sá gamli verður lagður af. Nýr golfvöllur hefur mikla sérstöðu þar sem spilað verður út í á og meðfram skógrækt.

Skíðasvæðið í Skarðsdal (Siglfirsku Alparnir) er meðal allra bestu skíðasvæða á landinu. Almenn opnun getur verið frá byrjun nóvember til loka apríl.