Fjölgun á Siglufirði eftir Héðinsfjarðargöng

Kjartan og Þóroddur

Athyglisverð grein Þórodds Bjarnasonar og Kjartans Ólafssonar um skammtímaáhrif Héðinsfjarðarganga gefur jákvæð áhrif á þróun fólksfjölda í Fjallabyggð. Þannig hefur dregið úr fólksfækkun á Ólafsfirði og sterkar vísbendingar um fjölguná Siglufirði en á vesturlöndum er ekki sjálfgefið að sú sé raunin með bættum samgöngum.

"Þóroddur Bjarnason prófessor og Kjartan Ólafsson lektor við Háskólann á Akureyri birtu grein í Þjóðfélaginu í síðustu viku um skammtímaáhrif Héðinsfjarðarganga á mannfjöldaþróun í Fjallabyggð.

Helstu niðurstöður hennar segja að eftir opnun Héðinsfjarðarganganna hefur dregið úr fólksfækkun í Ólafsfirði og sterkar visbendingar eru um fólksfjölgun á Siglufirði. Flutningsjöfnuður hefur batnað til muna og konum á barneignaraldri og börnum undir fimm ára aldri hefur fjölgað eftir göng. Jafnframt eru viðhorf unglinga og yngra fólks til áframhaldandi búsetu mun jákvæðari en fyrir göng. Langtímaáhrifin munu koma í ljós á næstu árum og áratugum.

Greinina í heild má lesa hér.

Rannsóknin er liður í stærri rannsókn á samfélagslegum áhrifum Héðinsfjarðarganga á mannlíf á norðanverðum Tröllaskaga.

Fjallað var um greinina í Fréttablaðinu í dag. Þar segir Þóroddur meðal annars: „Þessar niðurstöður eru talsvert jákvæðari en við bjuggumst við. Innlendar og erlendar rannsóknir hafa sýnt að samgöngubætur sem bæta lífskjör íbúanna umtalsvert leiða ekki alltaf til fólksfjölgunar. Samsetning mannfjöldans í Fjallabyggð var orðin afar óhagstæð eftir áratuga fólksfækkun og óvíst að ný tækifæri dygðu til að draga nægilega margt nýtt fólk til byggðarlagsins.“

„Jafnvel þótt jafnvægi næðist í fólksflutningum hefði hátt hlutfall eldri borgara og lágt hlutfall fólks á barneignaraldri að óbreyttu leitt til mikillar fólksfækkunar. Það hefur gengið eftir í Ólafsfirði en á Siglufirði hefur fækkun skráðra íbúa stöðvast og talsvert fleiri dvelja þar í raun en áður. Það skýrist að stórum hluta af aukinni byggðafestu fólks milli tvítugs og fertugs, sérstaklega meðal yngri kvenna,“ sagði Þóroddur".