Aðför að tjáningarfrelsinu
Valgeir T Sigurðsson sendi siglo.is opið bréf til Bæjarstjórnar Fjallabyggðar með yfirskriftinni "Aðför að tjáningarfrelsinu". Bréf Valgeirs kemur hér:
Aðför að tjáningarfrelsinu
Tjáningarfrelsið er einn af hornsteinum lýðræðisins og grundvöllur fyrir því að frjáls umræða og opinber skoðanaskipti
fái þrifist og þá ekki síst um mikilvæg málefni samfélagsins og stjórnmálamanna. Það kom því verulega
á óvart að á Íslandi skyldi vera til sveitarstjórn sem sendi frá sér einróma eftirfarandi ályktun, í lok árs
2012:
"Bæjarstjórn Fjallabyggðar lýsir vanþóknun sinni á ósmekklegri notkun Valgeirs T. Sigurðssonar, á mynd af ráðherra í
Ríkisstjórn Íslands á fána sem hann hefur dregið að húni við Aðalgötuna á Siglufirði."
Það, að bæjarstjórn Fjallabyggðar lýsi einróma yfir vanþóknun á því að bæjarbúi nýti
lögmætan rétt sinn til þess að tjá skoðun sína á einum umdeildasta stjórnmálamanni landsins, hlýtur að vera mikið
áhyggjuefni fyrir almenning í Ólafsfirði og Siglufirði.
Ég hef ekki orðið var við annað í samtölum mínum við Siglfirðinga, en að það sé almenn ánægja með flaggið
og sömuleiðis hafa viðbrögðin verið jákvæð á netinu. Viðhorf bæjarstjórnarinnar, sem birtust skyndilega í fundargerð
Fjallabyggðar, komu því verulega á óvart. Enginn bæjarstjórnarmaður hafði komið að máli við mig og lýst skoðun
sinni eða óskað eftir að flaggið yrði fjarlægt. Enginn bæjarstjórnarmaður eða starfsmaður Fjallabyggðar hafði óskað eftir
viðhorfum mínum til málsins eða þá að mér væri gefinn kostur á að tjá mig um meiðandi ályktun
bæjarstjórnar um skoðanir mínar.
Ég hef nýtt mér tjáningarfrelsið með því að segja óhikað skoðun mína á mönnum og málefnum í gegnum
tíðina og mun halda því áfram, þrátt fyrir frumhlaup bæjarstjórnar Fjallabyggðar, sem verður vart flokkað sem annað en
aðför að tjáningarfrelsinu.
Ályktun bæjarstjórnarinnar á ekki heima á 21. öldinni, en hægt hefði verið að skilja hjarðhegðun bæjarstjórnarinnar ef
fundurinn hefði verið haldinn fyrir daga prentfrelsins.
Framundan er kosningabarátta þar sem venjan er að menn reki áróður fyrir sér og sínum sjónarmiðum og jafnvel gegn öðrum. Ef
bæjarstjórnin ætlar að halda áfram á vafasamri braut, má ætla að næsta verk verði að merkja auglýsingar og skoðanir sem
eru bæjarstjórninni þóknanlegar.
Það væri miklu frekar í verkahring lýðræðiskjörinna fulltrúa almennings að standa vörð um réttindi borgaransna í
stað þess að grafa undan þeim.
Athugasemdir