Vorskemmtun yngri deilda grunnskóla Fjallabyggðar
Yngri deildir grunnskóla Fjallabyggðar héldu skemmtilega vorskemmtun í Tjarnaborg á föstudaginn fyrir fullu húsi en um 140 krakkar komu saman með fjölda atriða. Var þar til að mynda sungið lag sem sérstaklega var samið fyrir skólann um einelti.
Skemmtunin hófst með því að allir krakkar úr 1.-7. bekk komu saman og sungu nokkur lög en í kjölfarið kom hver árgangur fyrir sig með eigið atrið sem voru ýmist byggð upp á söng, tónlist eða leik. Atriði sjöunda bekkjar var sérstaklega útfært með broti úr öllum atriðum sem bekkurinn hafði sýnt síðastliðin sex ár, eða frá því í fyrsta bekk.
Sýningin sem hófst klukkan 17:00 stóð yfir í eina og hálfa klukkustund en að henni lokinni gengu gestir út með bros á vör eftir skemmtilega samverustund. Sérlegur fréttaljósmyndari Sigló.is, Guðný Kristinsdóttir var á staðnum og tók fjölda mynda fyrir okkur til að birta.
Athugasemdir