Blakklúbbarnir á Tröllaskaga sækja um Öldungamótið í blaki 2012

Blakklúbbarnir á Tröllaskaga Hyrnan, Súlur og Rimar frá Dalvík sem standa saman að umsókninni. Blakíþróttin á djúpar og sterkar rætur á Tröllaskaga og hefur verið ómissandi hluti af íþróttalífinu á Siglufjarði í um 40 ár og á Dalvík í um 25 ár. Blakklúbburinn Hyrnan á Siglufirði er meðal annars 40 ára á þessu ári og af því tilefni sækja Blakklúbbarnir á Tröllaskaga um að halda 37. Íslandsmót öldunga í blaki dagana 3.-5.maí 2012



Öldungur mótsins er tilnefndur: Óskar Þórðarson.


Blakklúbburinn Hyrnan á Siglufirði hefur verið með á Íslandsmótinu frá upphafi og innan hans eru virkir félagar sem hafa tekið þátt á öllum mótunum. Súlurnar á Siglufirði tóku fyrst þátt á mótinu árið 1980 þegar mótið var haldið á Siglufirði og hafa tekið þátt á öllum mótunum síðan þá. Blakklúbburinn Rimar á Dalvík tók fyrst þátt á mótinu 1990.

Með tilkomu Héðinsfjarðargangna og sameiningar Siglufjarðar og Ólafsfjarðar í Fjallabyggð ásamt hinum rótgrónu Múlagöngum og tengingar við Dalvíkurbyggð þá getum við boðið upp á níu velli í þremur íþróttahúsum í bæjarfélögunum. Þreksalur og sundlaug eru í sömu byggingu á öllum þremur stöðunum. Einungis 30 mínútna akstur er á milli Siglufjarðar og Dalvíkur og er Ólafsfjörður mitt á milli þessara staða. Hótel, gistihús, veitingarstaðir, söfn, verslanir og önnur þjónusta er í öllum þremur bæjarkjörnunum ásamt fjölbreyttu afþreyingarvali. Siglfirðingar eru þekktir fyrir að taka vel á móti gestum eins og þeir sem sótt hafa Siglómótið undanfarin ár geta vitnað um. Dalvíkingar tóku í notkun nýtt glæsilegt íþróttahús síðastliðið haust og héldu glæsilegt vígslumót af því tilefni.

Mikil gróska er í blakinu á Tröllaskagasvæðinu og til marks um það þá eru 8 lið frá félögunum skráð á Öldungamótið í Eyjum. Það að fá mótið á svæðið gæti ýtt enn frekar undir þá grósku og vonandi orðið til þess að grundvöllur skapist fyrir yngri flokka blak.

Öldungamótið hefur verið haldið 4 sinnum á Siglufirði og síðast árið 1998, en þá voru liðin í kringum 70 talsins og spilað á þremur völlum. Síðan þá hefur mótið vaxið mikið og það yrði okkur mikill heiður að fá þann möguleika að undirbúa og framkvæma öldungamótið árið 2012.

Með blakkveðju frá Tröllaskaga