Opnun ljósmyndasýningar Björns Valdimarssonar
Þann 17. júní verður opnuð sýning með ljósmyndum Björns Valdimarssonar í Saga-Fotografica ljósmyndasögusafninu á Siglufirði.
Sýndar verða myndir úr þrem myndaröðum frá síðustu árum. FÓLKIÐ Á SIGLÓ, sem byggir á myndum af fólki sem tengist Siglufirði. LÍFIÐ Á SAUÐANESI er með myndum frá bænum Sauðanesi við Siglufjörð. Auk hefðbundinna bústarfa eru hjónin þar meðal annars með vitaeftirlit, veðurathuganir og hestaleigu. Þriðja myndaröðin nefnist MINNISVARÐAR og er hún með myndum af eyðibýlum, öðrum mannvirkjum og gömlum farartækjum í landslaginu á Norðurlandi sem flest eiga það sameiginlegt að vera að eyðast og smám saman að verða hluti af náttúrunni.
Einnig verða kynntir nýir sýningagripir á ljósmyndasögusafninu. Þar á meðal forláta risastór rafmagnsdrifin sænsk Hugo Svenson Mahony myndavél sem var smíðuð 1946 í Gautaborg.
Safnið og sýningin verða opin daglega frá 13:00 til 16:00 nú í sumar.
Hægt er að semja um aðra skoðunartíma fyrir hópa.
Athugasemdir