..lögð verði áhersla á umhverfismál..
Norrænu umhverfisráðherrarnir knýja á um að lögð verði áhersla á umhverfismál í markmiðum Sameinuðu þjóðanna um sjálfbærni
Norrænu umhverfisráðherrarnir funduðu í Jukkasjärvi í Svíþjóð þann 7. febrúar 2013.
Umhverfisráðherrarnir samþykktu að vinna að því í sameiningu að lögð verði áhersla á umhverfismál í nýjum markmiðum Sameinuðu þjóðanna um sjálfbærni.
Ákvörðunin um alþjóðleg markmið um sjálfbærni er ein mikilvægasta niðurstaða Ríó+20, ráðstefnu Sameinuðu þjóðanna um sjálfbæra þróun, sem haldin var í júní 2012.
Norrænu umhverfisráðherrarnir leggja áherslu á að vistkerfið sé afar mikilvægt fyrir hagkerfið og tækifæri einstaklinga til að þróast. Þegar markmið um hnattræna þróun eftir 2015 verða sett, verður að virða vistfræðileg takmörk jarðar. Í alþjóðlegum umhverfissamningum, t.d. loftslagssamningnum og í samningi um líffræðilegan fjölbreytileika, eru nú þegar mörg markmið sem eiga að vinna saman og efla ný markmið um sjálfbærni.
„Að efla umhverfissviðið þannig að við höldum okkur innan vistfræðilegra marka jarðar er afar mikilvægt fyrir sjálfbæra þróun til lengri tíma litið og það ætti að endurspeglast í alþjóðlegum markmiðum. Norrænu ríkin búa að mikilli reynslu sem þau geta deilt“, sagði Lena Ek sem var fundarstjóri á fundi umhverfisráðherranna.
Athugasemdir