20cm jafnfallinn snjór og nýtt aðsóknarmet
Undri dyggri stjórn Egils “Skarðsprins” Rögnvaldssonar hafa félagarnir í Siglfirsku ölpunum nú unnið hörðum höndum að því að þjappa nýfallinn snjóinn. Draumaaðstæður í fjallinu segir prinsinn sem er í skýjunum eftir nýtt met gærdagsins.
Það voru 1.200 manns í fjallinu í gær segir Egill og því nýtt aðsóknarmet sett frá því á skýrdag þegar þar voru 1.050 manns. Aðstæður í dag eru alveg frábærar og við höfum unnið að því að þjappa allar brautir. Utanbrautarfærið er náttúrulega alveg æðislegt fyrir þá sem kjósa að leika sér í púðrinu og það hefði ekki verið hægt að biðja um betri veðurspá. Snjókoma seinnipartinn í gær og svo komið logn og fjögurra gráðu frost í dag, hann á líka að rífa af sér skýin og samkvæmt spánni á að vera orðið léttskýjað uppúr hádegi. Á morgun á síðan að vera heiðskýrt og rétt undir frostmarki í fjallinu.
Ljósmyndari: Gulli stebbi
Athugasemdir