Frívaktin í kvöld

Lokaæfing fyrir Jónsmessuhátíð fór fram í gærkvöldi. Hljómurinn í Bátahúsinu var stórkostlegur og mikið stuð á mannskapnum. Hljómsveitin og söngvararnir skemmtu sér og hlógu mikið og hafði þáttarstjórnandinn orð á því að þau yrðu að reyna að halda andlitinu á sjálfum tónleikunum.

Þetta er í fimmta sinn sem Jónsmessuhátíð Síldarminjasafnsins er haldin, og fjórða Frívaktin. Hvert sinn eru nýjir gestasöngvarar sem gera það að verkum að tónleikarnir eru síbreytilegir. Nú eru það Helena Eyjólfsdóttir, gamalreynd og margfræg í bransanum og Björn Jörundur, af yngri kynslóð íslenskra söngvara, sem halda uppi fjörinu.

Ekki má gleyma hinum frábæru Gómum sem skiptast á að syngja einsöng og mynda þéttan raddaðan bakvegg. Greinilegt var á æfingunni í gær að tónleikarnir í kvöld verða ekki síðri en fyrri Frívaktartónleikar.

Texti og mynd: Aðsent.