Aftakaveður á Holtavörðuheiði

Aftakaveður gerði á Holtavörðuheiði í gærkvöldi og lentu tugir ökumanna þar í vandræðum á misvel útbúnum bílum. Lokað var fyrir umferð rétt fyrir klukkan níu  vegna veðurs. 

Björgunarsveitir voru á heiðinni í gærkvöldi til að aðstoða ökumenn við að komast niður. 20-30 bílar voru í langri lest uppi á háheiðinni á ellefta tímanum og tókst að aðstoða suma ökumenn við að komast áfram en aðrir sátu fastir.

Þegar veður leyfir munu björgunarsveitir og Vegagerðin aðstoða fólk við að sækja bíla sína. Heiðin er enn kolófær, ekki síst vegna bílanna sem voru skildir eftir, sumir á miðjum veginum.

Spáin gerir ráð fyrir suðvestan 15-23 og talsverðri rigningu. Suðvestan 13-20 og él seint í kvöld og á morgun. Hiti  1 til 6 stig fram undir miðnætti, en síðan frost 0 til 7 stig.