Ágætis færi í Skarðinu og allar lyftur opnar

Ekki láta blekkjast af snjóleysinu niðri í bæ, nægur er snjórinn í skíðabrekkunum í Skarðsdal. Snjórinn er vel mulinn í öllum brekkum þannig að færið er mjög gott og hæfir öllum segir á heimasíðu skíðasvæðisins skard.fjallabyggd.is.


Svæðið hefur verið þokkalega sótt milli jóla og nýárs og voru um 120 manns í fjallinu á mánudag. Það þarf þó að fara varlega þar sem ekki er mikill snjór fyrir utan hefðbundnar brekkur, ekki er því æskilegt að þvælast útfyrir troðnar brautir. Hæg austan átt á að vera í dag, léttskýjað og hiti um frostmark í skarðinu samkvæmt veðurfréttum vedur.is.

Stefnt er á að svæðið sé opið alla daga um jól og áramót og eru veðurguðirnir þeir einu sem ættu að geta komið í veg fyrir það.