Árshátíð Siglfirðingafélagsins

Fimmtíu ára afmælishátíð Siglfirðingafélagsins var haldin með miklum bravúr laugardaginn 22. október á Broadway. Um 500 Siglfirðingar og áhangendur skemmtu sér konunglega eins og þeim einum er lagið og dansinn dunaði langt fram á nótt. Mikið var um að árgangar hittust og skemmtu sér saman.
     
Stormarnir og MAX léku fyrir dansi af sinni alkunnu snilld og færir félagið þeim þakkir fyrir þeirra framlag. Gylfi Ægisson, Megas og Rúnar tóku nokkur þekkt lög, þ.á.m. lagið um Gústa Guðsmann og Helgi Svavar og Þorsteinn Guðmundsson tóku nýtt lag tileinkað Siglufirði, sérsamið í tilefni hátíðarinnar. Veislustjóri var Gunnar Trausti sem lét fjúka í kviðlingum.

Hlöðver, Óli og Tommi Kára stjórnuðu fjöldasöng í Lindin tær og Anna Lára, Bryndís Bára og ekki laust við að einhverjir hafi komist við í þeim öfluga fjöldasöng. Einhverjir fóru ríkari heim af veraldlegum gæðum og eru á leið í Evrópuferð eftir að dregið hafði verið í happdrætti félagsins.
        
Siglfirðingafélagið þakkar fyrir sig og þakkar öllum þeim sem lögðu hönd á plóg við undirbúning afmælishátíðarinnar.



































Með kveðju
Gunnar Trausti