Brjóstmynd af séra Bjarna

Í gær var skrifað undir samning um gerð brjóstmyndar af séra Bjarna Þorsteinssyni og verður henni komið fyrir í haust í námunda við Siglufjarðarkirkju, á litlu torgi sem nefnt hefur verið Bjarnatorg.

Ragnhildur Stefánsdóttir myndhöggvari er að vinna að gerð brjóstmyndarinnar, Þór Sigmundsson steinsmiður gerir stöpul undir myndina og Fanney Hauksdóttir arkitekt hannar torgið. Arnold Bjarnason, barnabarn séra Bjarna, kostar gerð myndarinnar og Páll Samúelsson kostar gerð torgsins.

Séra Vigfús Þór Árnason, fyrrverandi sóknarprestur á Siglufirði, hefur unnið að undirbúningi þessa verkefnis í samvinnu við sóknarnefnd og sóknarprest Siglufjarðarkirkju.

 

Texti og mynd: Jónas Ragnarsson