Bílabjörgun á Kili

Um kl. 22:00 á laugardagkvöldið 5. febrúar s.l. fékk Gunnar Júlíusson beiðni um hjálp frá vetrarferðafélögum sem voru á ferðalagi á Kili. Ein af bifreiðunum í hópnum hafði farið niður í gegnum ís og á kaf í vatn, upp undir miðja glugga.
Tveir voru í bílnum en sluppu þeir út um hliðarglugga og upp á ísinn.

Nokkrir bílar voru saman á þessu ferðalagi  og því engin hætta á ferðum.
Gunnar brá sér í samfesting utan yfir náttfötin, fyllti tanka bílsins og hengdi bílakerruna aftan í sex hjóla trukkinn og snaraði sér af stað í björgunarleiðangurinn.

Óskar Ólafsson bóndi á Steiná í Svartárdal, sem einnig hefur ferðast með þessum félögum, ákvað að leggja einnig hönd á plóg við björgunina og tók ýmislegt með sér til ferðarinnar svo sem keðjusög, planka og fl. og þeir félagar hittast síðan við Húnaver.

Síðan fara þeir sem leið liggur upp Blöndudal og framhjá Blönduvirkjun og upp á Kjöl. Ferðin gekk greiðlega því ekki var snjókorn á veginum.

Nokkrum kílómetrum sunnan við Seyðisá fer að örla á snjó og var þá bílakerran skilin eftir, og haldið áfram.
Kl. 01.30 um nóttina er síðan komið á áfangastað sem er rétt norðan við afleggjarann að  Beinhól, þar sem Reynistaðarbræður báru beinin.

Aðkoman var frekar nöturleg, 8 stiga frost, vestan gjóla og bílinn nánast á kafi í vatni, um það bil 100 metra frá landi. Reynt var með ýmsum brellibrögðum að ná honum upp á ísinn sem gekk ekki, en síðan var ákveðið að saga rennu í ísinn og ná bílnum þannig upp.

Eftir tveggja tíma hvíld í bílunum var hafist handa við að saga.Ísinn var sagaður í fleka og var flekunum ýmist ýtt undir ísskörina eða fleytt framfyrir bílinn um leið og hann var dreginn nær landi.
Það tók um það bil 6 klukkutíma puð að koma bílnum á þurrt, og var síðan hafist handa við að tappa vatni af vél og drifbúnaði.

Bíllinn var síðan dreginn norður að Seyðisá og þar var hann settur á bílakerruna og fluttur til Blönduóss í upphitað húsnæði. En Gunnar kom síðan heim til sín eftir 23 tíma volk í náttfötunum sínum góðu.




Ljósm. Benóný Dagur Brynjarsson.

Ljósm. Benóný Dagur Brynjarsson

Ljósm. Benóný Dagur Brynjarsson

Ljósm. J.V.G.

Ljósm. J.V.G.

Ljósm. J.V.G.

Ljósm. J.V.G.

Ljósm. J. V. G.