Bryggjuhúsið.

Starfsmenn Berg unnu að því að saga gat á þakið á Bryggjuhúsinu fyrir framan Bátahúsið og var gamall frystiklefi fluttur úr húsinu.

Bryggjuhúsið sem eitt sinn var vinnupláss fyrir söltun má muna fífil sinn fegurri og er nú nánast ónýtt.

Það stendur til að rífa bryggjuhúsið og þar með hverfur eitt síðasta bryggjuhúsið á Siglufirði.

Sunnubrakkinn er nú horfinn og eftir mun standa Róaldsbrakkinn. Það verður þó vonandi horft til þessa byggingastíls þegar framtíðarframkvæmdir á svæðinu eru skipulagðar.

Það er ákveðinn sjarmi yfir þessu húsi og það verður söknuður af því.