Fjölgar hratt á Siglufirði
Undanfarna daga hefur fjölgað hratt á tjaldsvæðum bæjarins og ljóst að fólk er að koma tímanlega fyrir Síldarævintýrið til að tryggja sér stæði. Það er nú þegar margt um manninn í bænum og fólk spókar sig um í góða veðrinu.
Undirbúningur fyrir Síldarævintýrið er á lokastigi, það verður margt til skemmtunar í bænum á hinum ýmsu stöðum eins og sjá má í dagskránni. Á laugardag og sunnudag koma auk þess skemmtiferðaskip til Siglufjarðar og munu farþegar sjá síldarsöltunarsýningu á Síldarminjasafninu og virða fyrir sér mannlífið.
Ljóst er að lögreglan þarf að vera með umferðastjórn á
Múlagöngum og Strákagöngum meðan hátíðarhöldin standa yfir því í gær myndaðist
umferðarhnútur í Múlagöngum sem tók lögregluna um 60 mínútur að leysa úr.
Í gær kom frá Akureyri, í tveimur rútum, hópur af
skólafólki, kennurum og fararstjórum samtals um 140 manns frá 12 þjóðlöndum undir
stjórn Ara Trausta jarðfræðings. Skoðaði hópurinn sig um og skellti sér svo í
strandblak á Rauðkulóð. Í framhaldi var farið um borð í skemmtiferðaskip sem
kom frá Akureyri til að sækja hópinn. Frá Siglufirði var haldið á Strandir þar
sem nemendur áttu að fara í land og skoða fuglalíf og þaðan var ferðinni heitið
til Grænlands.
Um kl. 22:00 komu bifhjólamenn á fákum sínum, um 30 manns frá Akureyri, og fengu sér veitingar á Kaffi Rauðku, áður en haldið var til baka, góður kvöldrúntur í blíðunni.
Texti og myndir: GJS. Síðasta mynd af skipinu með flugvél yfir sér og flugvél stök tók SK.
Athugasemdir