Lengstu köstin á landinu

Líkt og undanfarin ár stendur Umf Glói fyrir frjálsíþróttaæfingum í sumar  fyrir krakka í 4.-10. bekk, en æfingarnar hófust þó ekki fyrr en í byrjun ágúst að þessu sinni.

Flest börn á Siglufirði eru upptekin við knattspyrnuiðkun á sumrin og því hafa ekki nema um 10 börn stundað æfingar í frjálsum íþróttum undanfarin sumur en á veturna er starfið blómlegra og hafa iðkendur verið 20-25 talsins undanfarna vetur.

Á sumrin er æft á svæðinu vestan við Mjölhúsið og hafa kastgreinar aðallega verið stundaðar enda býður aðstaðan ekki upp á mikið meira. Iðkendur Glóa hafa í gegnum árin náð mjög góðum árangri í þessum greinum og raðað sér í efstu sæti á afrekaskrám Frjálsíþróttasambands Íslands jafnt innanhúss sem utan.

Í haust hafa iðkendur Glóa tekið þátt í tveimur mótum; Fimmtudagsmóti UMSS á Sauðárkróki og kastmóti hér heima. Árangur hefur verið mjög góður og allir hafa bætt sig frá því í fyrra. Tveir iðkendur eiga lengstu köst landsins í sínum aldursflokki en það eru þau Hjörvar Már Aðalsteinsson sem á lengsta kast í kringlukasti hjá 11 ára strákum og Elín Helga Þórarinsdóttir sem hefur kastað lengsta allra 11 ára stúlkna á landinu í spjótkasti en hún átti í fyrra lengstu köstin í bæði kringlukasti og spjótkasti hjá 10 ára stúlkum á landinu.

Tvö mót eru framundan hjá frjálsíþróttaiðkendunum, Arnar Þór Sverrisson mun keppa í kúluvarpi á Íslandsmóti 15-22 ára nú um helgina og í vikunni verður farið á Aldursflokkamót UMSE á Akureyri.

? og Jóel

Salka og Elín Helga.

Guðbrandur

Elín Helga og Patrekur

Hjörvar og Elín Helga.

Texti og myndir: ÞH