Hestaleiga og reiðnámskeið á Sauðanesi

Herdís og dætur hafa verið með reiðnámskeið undanfarið. Herdís segir að það hafi verið mjög vel sótt og krakkarnir hæst ánægðir. 

 

Ég fór nú einu sinni til tvisvar á hestbak hérna í gamla daga. Ég ætlaði heldur betur að gerast hestamaður. Ég fékk meira að segja folald í fermingargjöf. En því miður þurfti ég að selja hestinn af því að ég þurfti lífs nauðsynlega að  kaupa mér skellinöðru. Hondu MTX  50 "81 módelið. Alveg ljómandi góður járnhestur.

 

Þegar ég hitti Herdísi og krakkana sem voru á reiðnámskeiðinu þá fékk ég þennan gamla hestafiðring aftur. Hrikalega hlýtur þetta að vera skemmtilegt sport. Ég á örugglega eftir að lofa Ólöfu minni að teyma mig einhvern tímann á hesti. Og þá að sjálfsögðu mun ég leigja mér hest frá Sauðanesi.

 

Herdís og fjölskylda á Sauðanesi eru ekki bara með reiðnámskeið, þar er hestaleiga líka og þið getið kynnt ykkur hestaleiguna nánar hér

 

Sauðanes er í cirka 5-10 mínútna fjarlægð frá Siglufirði. Ef þú ferð á hesti ertu töluvert lengur.

 

Hestaleigan verður svo með hestasport á grasbala við Alþýðuhúsið klukkan 13:00 á sunnudeginum þar sem fjölskyldur geta komið og krakkar geta fari á hestbak.

 

 Lukku-láki(Ægir Eðvarðs) og Daltonarnir (Gulli Stebbi og Hrólfur) munu hugsanlega kíkja á svæðið, allavega einn af þeim.