Jákvæðar fréttir úr Fjallabyggð

Fréttir

Jákvæðar fréttir úr Fjallabyggð

Nú er blásið til jákvæðrar sóknar í Fjallabyggð.

Þórarinn Hannesson eða Tóti í Ljóðasetrinu, hefur blásið í ansi hreint jákvæða herlúðra og hélt kynningarfund í Ljóðasetri Íslands um mjög svo þarft og skemmtilegt verkefni föstudaginn 27. desember.

Stofnuð hefur verið facebook síða sem ber nafnið "Jákvæðar fréttir úr Fjallabyggð" og er á þessari slóð hér fyrir neðan :

https://www.facebook.com/pages/Jákvæðar-fréttir-úr-Fjallabyggð/612744838762144?fref=ts

Verkefnið gengur út á að vekja athygli á góðum verkum í Fjallabyggð og auka samkennd á milli íbúa.

Verkefnið er unnið í samvinnu við þær Margréti og Maríu á Trölla FM 103,7 og munum við segja frá því og ræða um það í þættinum hjá þeim annað kvöld en M&M eru annars með þátt sinn á Trölla FM 103,7 á miðvikudagskvöldum frá klukkan 20:00 - 22:00

Vísan sem Tóti samdi í tilefni fundarins segir í raun og veru allt sem segja þarf og er hér fyrir neðan.

Jákvæðar fréttir úr Fjallabyggð

færum við ykkur í dag.
Aukum samkennd, eflum dyggð
og okkar bæjarbrag.

Á facebook-síðu verkefnisins er þetta að finna :

Markmiðið með verkefninu er m.a. að dæla út í samfélagið jákvæðum fréttum af öllum þeim góðu verkum sem hér eru unnin og þeim spennandi verkefnum sem eru í gangi í Fjallabyggð, vekja á þeim athygli og skapa jákvæðari umræðu.

Fréttaflutningurinn verður þó aðeins í skeytastíl, þ.e. ekki ítarlegar fréttir, en fjölmiðlar og fréttasíður mega gjarnan taka upp efni af síðunni og vinna um það nánari fréttir.

Ef þú ert með áhugaverða og jákvæða frétt af lífinu í Fjallabyggð máttu gjarnan senda okkur skilaboð hér á síðunni en athugið þó að þetta er ekki síða til að auglýsa viðburði aðeins til að segja fréttir af viðburðum/verkum sem hafa farið fram.

Glæsilegir JÁ-kvæðir straumar úr Fjallabyggð og um að gera að deila jákvæðninni áfram.

Og svo nokkrar myndir af þessu skemmtilega og jákvæða fólki sem mætti á fundinn.