Einar Már les í dag í Kaffi Rauðku

Þessa dagana fer ljóðahátíðin Glóð fram hér á Siglufirði en þetta er fimmta árið í röð sem hátíðin er haldin. Það eru Ungmennafélagið Glói og Félag um Ljóðasetur Íslands sem standa að hátíðinni.   

Dagskráin er í 11 liðum en stærsti viðburðurinn fer fram í dag, laugardag,  kl. 15.30 í Kaffi Rauðku þegar Einar Már Guðmundsson rithöfundur les úr verkum sínum.



Einar Már Guðmundsson. Mynd tekin af netinu.

Hátíðin hófst á fimmtudag, með venjubundnum hætti , þegar nemendur úr 6. bekk Grunnskóla Fjallabyggðar gengu á millli vinnustaða og lásu ljóð fyrir bæjarbúa. Var þeim alls staðar vel tekið og fólk var ánægt að fá smá andlega næringu í annríki dagsins.

Guðmundur, Elín Helga, Sigríður Ása og Hjörvar, að lesa ljóð á vinnustöðum.

Á fimmtudagskvöld var afar skemmtilegt Ungskáldakvöld í Gránu þar sem Gréta Kristín Ómarsdóttir,sem ólst upp á Siglufirði, og Vilhjálmur Bergmann Bragason fóru á kostum í lestri sinna ljóða.  Á föstudag las Þórarinn Hannesson úr verkum sínum í Grunnskóla Fjallabyggðar og í Skálarhlíð og seinni part föstudags var frumsýnd fyrir fullu húsi í Ljóðasetrinu ný leikgerð um ævi og kveðskap Lauga pósts. Er þessi dagskrá í tali og tónum og komu bæði leikarar og tónlistarfólk að uppsetningunni.

Gréta Kristín Ómarsdóttir að lesa ljóð í Gránu.

Vilhjálmur Bergmann Bragason, Gréta Kristín Ómarsdóttir og Þórarinn Hannesson.

Á föstudagskvöld fór Páll Helgason á kostum fyrir fullu húsi í Þjóðlagasetrinu. Þar flutti hann limrur sínar af fólkinu á Brekkunni en þessi limruflokkur er um eftirminnilegt fólk frá æskudögum Páls á svæðinu fram af kirkjunni , en þar stóðu mun fleiri hús en nú og var þessi hluti bæjarins kallaður Brekkan. Limrurnar eru stuttar svipmyndir af þessu fólki, ortar af virðingu fyrir viðfangsefnunum en leiftrandi af græskulausu gríni eins Páls er háttur. Inn á milli bætti Páll svo við ýmsum sögum af fólkinu og sagði frá lífi þeirra og aðstæðum. Þessi skemmtun var á við besta uppistand og voru hláturverkir í kinnum og kvið viðstaddra þegar Páll hafði lokið flutningum.

Páll og Þórarinn.

Páll Helgason.

Kristján, Örlygur og Páll.

Þórarinn að þakka gestum fyrir komuna.

Hátíðinni lýkur í dag með þremur viðburðum. Sem fyrr segir les Einar Már úr verkum sínum í Kaffi Rauðku kl. 15.30., úrslit í ljóðasamkeppni hátíðarinnar verða kunngjörð í Ráðhússalnum kl. 17.00 og þar geta gestir skoðað öll ljóðin sem  urðu til í keppninni ásamt málverkunum sem þau voru ort út frá. Hátíðinni lýkur svo með opnu húsi í Ljóðasetrinu í kvöld þar sem verður boðið upp á gítarspil, söng, ljóðalestur og léttar veitingar.

Texti: Þórarinn Hannesson
Myndir: GJS