Meirihluti hafnar Icesave-lögunum

Meirihluti Íslendinga, eða tæp 55 prósent, hyggst hafna Icesave-samningnum í þjóðaratkvæðagreiðslunni á laugardag.

Hringt var í 800 manns. 90 prósent sögðu ýmist mjög líklegt eða frekar líklegt að þeir sæktu kjörfund. 76 prósent gáfu upp afstöðu sína, 24 prósent sögðust ekki hafa gert upp hug sinn. 54,8 prósent ætla að hafna Icesave-lögunum, 45,2 prósent hyggjast samþykkja þau.

Þetta er svipuð niðurstaða og í könnun sem Markaðs og miðlarannsóknir gerðu fyrir Stöð 2 og greint var frá í gærkvöld. Þar sögðust tæp 57 prósent ætla að segja nei og rúm 43 prósent já. Þetta er viðsnúningur frá fyrri könnunum sem allar hafa bent til þess að Icesave-samningurinn verði samþykktur.

Um þrettán þúsund manns hafa þegar greitt atkvæði utankjörfundar á landinu öllu sem er mun meiri þátttaka en þegar kosið var um síðasta samning.