Starfsmannafélag Já á Akureyri

Starfsmannafélag Já á Akureyri hélt í sína lokaskemmtiferð laugardaginn 10.september, en starfsstöðinni var sem kunnugt er lokað þann 31. ágúst síðastliðinn.

Þótti vel við hæfi að hefja ferðinna á Siglufirði undir frábærri leiðsögn frá Guðmundi Skarphéðinssyni, en nokkrir brottfluttir Siglfirðingar hafa alltaf verið stór hluti af starfsmannahóp Já.

Á Siglufirði var Síldarminjasafnið skoðað og fengið sér kaffi á Kaffi Rauðku. Eftir allt of stutt stopp var svo skundað aftur af stað og haldið til Hofsóss. Á Hofsósi söng Alexandra Chernyshova, óperusöngkona fyrir hópinn í Hofsóskirkju og boðið var upp á dýrindis kaffi og bakkelsi á veitingastofunni Sólvík.

Frá Hofsósi var haldið á Sauðárkrók þar sem Björn Björnsson, fv. skólastjóri fræddi hópinn um helstu kennileiti Skagafjarðar og kíkt var við á ógleymanlegu safnasafni Björns Mikaelssonar, fv. lögreglustjóra. Að lokum var komið við á Byggðasafni Skagfirðinga áður en haldið var til Varmahlíðar.

Á Hótel Varmahlíð fékk hópurinn úrvals þjónustu, 5 stjörnu máltíð og söng og trallaði fram eftir kvöldi undir dyggri stjórn Sigvalda Gunnarssonar frá Löngumýri.

Á sunnudeginum hélt svo hópurinn himinsæll heim á leið og eru íbúar Fjallabyggðar og Skagafjarðar svo sannarlega höfðingjar heim að sækja.







Með kveðju: María H. Marinósdóttir

Myndir: GJS