Myndbandakeppni fyrir grunnskólanemendur

Innsent efni.

Myndbandakeppni fyrir grunnskólanemendur

Ævar vísindamaður er glænýr þáttur á RÚV fyrir börn og unglinga, stútfullur af ævintýralegum tilraunum og æsispennandi fróðleik. Þættirnir hefja göngu sína eftir áramót en ungir vísindamenn hafa nóg að gera þangað til.
Frá og með hádegi í dag efnir Ævar til myndbandakeppni meðal grunnskólanemenda á Íslandi; bekkjarkeppni fyrir 1.-10. bekk og einstaklingskeppni fyrir alla 16 ára og yngri.

Verðlaunin eru glæsileg; vísindapakkar frá Marel (sem innihalda m.a. uppblásið sólkerfi, stafrænar smásjár, slímkennslusett, loft-fallbyssur og skordýrasafnara) og fyrstu eintökin af nýrri bók eftir Ævar vísindamann, Umhverfis Ísland í 50 tilraunum, sem kemur út í vor. Sigurmyndböndin eru svo spiluð í sjálfum lokaþættinum.

Það er enginn vandi að taka þátt; krakkarnir gera tilraun, taka hana upp og setja á netið.
Slóðin er svo send til Ævars á aevarvisindamadur@ruv.is
Tilraunirnar geta verið margvíslegar, t.d. eitthvað sem bekkurinn finnur upp á sjálfur, finnur í bók eða kennarinn stingur upp á. Lögð verður áhersla á vönduð vinnubrögð, góðar útskýringar og áhuga á viðfangsefninu við mat á myndböndunum.
Skilafrestur er til 25. nóvember næstkomandi.
Allar nánari upplýsingar má finna á www.ruv.is/aevar<http://www.ruv.is/aevar>

---

NÁNAR UM ÆVAR VISINDAMANN

Ævar vísindamaður hefur verið fastagestur í Stundinni okkar síðustu árin en hefur nú sprengt hana utan af sér og er kominn í nýja og enn stærri tilraunastofu. Ævar vísindamaður er leikinn af Ævari Þór Benediktssyni, sem jafnframt skrifar þættina. Eggert Gunnarsson leikstýrir. Þættirnir eru unnir í samstarfi við Sprengjugengið úr HÍ, Marel og Vísindavefinn.

Allar nánari upplýsingar um þættina og myndbandakeppnina, ásamt myndböndum og skemmtilegum ljósmyndum bak við tjöldin má finna áwww.ruv.is/aevar<http://www.ruv.is/aevar>
Fyrir enn frekari upplýsingar má ná í Ævar á aevarthor@gmail.com og í síma 691-7893 eða Eggert leikstjóra á eggertg@ruv.is eða í síma 699-5062.