Ólympíuleikar trúbadora heimsækja Sigló klukkan 21:00 á föstudag

Dagana 17.-25. Ágúst næstkomandi munu Ólympíuleikar trúbadora standa yfir á Íslandi, en hér er um að ræða fjölþjóðlegt tónleikaferðalag söngvaskálda sem komin eru til Íslands til að leika á Melodica tónlistarhátíðinni sem fer fram helgina 26. – 28. Ágúst nk. Á Sigló munu þeir sækja föstudaginn 19. ágúst.


Söngvaskáldin koma víða að, frá Ítalíu, Bandaríkjunum, Ástralíu og Þýskalandi og munu ferðast um landið í tveimur hópum, en með þeim í för verða tveir íslenskir „fararstjórar“.

Hóparnir munu leika víða um land og taka sérstakan Vestfjarðarúnt, en skipuleggjand ferðalagsins Svavar Knútur, söngvaskáld, segir að ekki sé hægt að bjóða erlendum listamönnum til Íslands án þess að bjóða þeim upp á að upplifa töfra vestfjarða.

Um miðbik ferðarinnar, laugardaginn 20. Ágúst munu trúbadorarnir hittast allir á Akureyri og fagna þar ásamt heimamönnum úr ranni söngvaskálda í hlöðunni að Litla Garði. Hefjast þar herlegheitin klukkan sex og verður þar nokkurs konar minnkuð útgáfa af Melodicu hátíðinni.

Eftir Akureyrartónleikana fara hóparnir aftur í sitt hvora áttina og setjast í tvo daga í söngvasmiðjur, þar sem þeir semja lög saman, annars vegar á Djúpavík á Ströndum og hins vegar í Skagafirði. Þessi lög verða síðan flutt á Melodica hátíðinni.

Ólympíuleikar trúbadora voru síðast haldnir hér á landi árið 2007 og fóru þá fjórir listamenn hringinn kringum landið við frábærar undirtektir heimafólks. Tveir af þessum listamönnum, þeir Pete Uhlenbruch og Torben Stock eru komnir aftur til að taka þátt í þessu skemmtilega samstarfi.

Gert er ráð fyrir að miðaverð á alla tónleika verði 1.000 krónur, og ókeypis fyrir börn á grunnskólaaldri í fylgd með fullorðnum, en öll viðbótarframlög eru vel þegin.

Hér að neðan má sjá liðsskipan hópanna og vísanir í tónlist þeirra.

Hópur 1:
Owls of the swamp (AUS)   www.soundcloud.com/owlsoftheswamp
Athebustop (IT)    www.soundcloud.com/athebustop
Torben Stock (ÞÝS)  www.soundcloud.com/torbenstock
Elliot Rayman (USA)  www.myspace.com/elliotrayman
The Friday night idols (IS)  www.myspace.com/thefridaynightidols

Fim. 18. ágúst kl. 21 - Patreksfjörður - Sjóræningjahúsið
Fös. 19. ágúst kl. 21 - Súðavík - Melrakkasetrið
Lau. 20. ágúst kl. 18 - Akureyri - Hlaðan Litla Garði
Mið. 24. ágúst kl. 21 - Grindavík - Bryggjan
Fim. 25. ágúst kl. 21 - Eyrarbakki - Merkigil


Hópur 2:
Phia (AUS)   www.listentophia.com
Joshua Teicher (AUS) www.videodaymusic.com
Kendy Gable (USA) www.myspace.com/kendygable
David Kean (AUS)
Daníel Jón (IS)

Fim.  18. ágúst kl. 21 - Eyrarbakki - Merkigil
Fös. 19. ágúst kl. 21- Siglufjörður - Kaffi Rauðka
Lau.   20. ágúst kl. 18- Akureyri - Hlaðan Litla Garði
Mán.  22. áúgst kl. 21- Hótel Djúpavík_
Þri.     23. ágúst kl. 21- Hólmavík - Galdra-loftið
Mið.  24. ágúst kl. 21 - Suðureyri - Talisman