Reitir tilnefndir til Eyrarrósarinnar

mynd: www.reitir.com

Eyrarrósin er viðurkenning til framúrskarandi menningarverkefna á starfssvæði Byggðarstofnunnar og sóttu fjörutíu verkefni um hana nú í ár. Þrjú þeirra munu hljóta viðurkenningu og eitt þeirra mun hljóta Eyrrarrósina. Sú nýbreytni er á í ár að birta lista yfir þau tíu verkefni sem eiga möguleika og er verkefnið Reitir á Siglufirði þeirra á meðal.

Í fréttatilkynningu frá Eyrarrósinni segir meðal annars að "frá árinu 2012 hefur verkefnið Reitir boðið árlega um þrjátíu listamönnum víðs vegar að úr heiminum til Siglufjarðar til að taka þátt í tilraunakenndri nálgun við hina hefðbundnu listsmiðju. Fjöldbreytt reynsla og ólíkur bakgrunnur þátttakenda verður þar uppspretta nýstárlegra verka sem á einn eða annan hátt fjalla um Siglufjörð. Með virkri þátttöku íbúa hefur á stuttum tíma orðið til grunnur að þverfaglegu tengslaneti og skapandi alþjóðasamstarfi sem veitt hefur bæjarbúum nýja sýn á umhverfi sitt". 

Það er gaman að sjá svo skemmtilegt verkefni eins og Reiti vera tilnefnt til Eyrarrósarinnar enda eru kröfurnar miklar og verkefnin bæði stór og krefjandi sem rata á lista þeirra tíu sem eiga möguleika í ár. Önnur verkefni sem tilnefnd eru til viðurkenningarinnar eru Verksmiðjan Hjalteyri, Hammondhátíð á Djúpavogi, Áhöfnin á Húna II, Skrímslasetrið á Bíldudal, Kammertónleikar á Kirkjubæjarklaustri, Tækniminjasafn Austurlands, Listasetrið Bær í Skagafirði, Kómedíuleikhúsið og Þjóðhátíð Vesturlands.

Afar gaman er að sjá þrjú verkefni af Tröllaskaga meðal þessara tíu verkefna og gefur það til kynna þá gríðarlega miklu möguleika sem opnuðust við Héðinsfjarðargöng.