Siglufjarðarkirkju berast veglegar gjafir

Siglufjarðarkirkja á marga velunnara, eins og sannast hefur í gegnum árin. Kiwanisklúbburinn Skjöldur var á dögunum að leggja peningagjöf inn til barnastarfsins, og þar áður höfðu Páll Samúelsson, Arnold Bjarnason og fleiri gert slíkt hið sama,

án þess að hátt færi, og í tilefni 80 ára afmælis kirkjunnar í ágúst næstkomandi hafa Kvenfélagið Von og Systrafélag Siglufjarðarkirkju tekið höndum saman og gefið rúmar 800.000 krónur til að setja mætti nýtt áklæði á 80 stóla safnaðarheimilisins.

Og skemmst er að minnast fjólubláa altarisklæðisins sem var gefið í lok síðasta árs, og er til brúks á aðventu og föstu, og spurst hefur að annað sé á leiðinni, og nú grænt.

Að bara fátt eitt sé nefnt.

Vilja sóknarnefnd og prestur koma á framfæri innilegu þakklæti og kveðjum til téðra aðila fyrir þennan mikla  hlýhug og rausn í garð kirkjunnar.



Einn af stólunum eftir andlitslyftinguna. Framkvæmdina annaðist Haukur Óskarsson húsgagnabólstrari og gerði þetta bæði fljótt og vel.



Nýja áklæðið er afar vandað, fallegt og sterkt plussefni, eldvarið.

Myndir og texti: Sigurður Ægisson | sae@sae.is.