Síldin kemur og síldin fer

Það var líf og fjör við Róaldsbrakka þegar síldarsöltunarfólk sýndi gamla takta og heillaði gesti og gangandi með sér á vit síldarinnar.

Siglfirðingar og norrænir gestir okkar fengu að upplifa alvöru síldarstemningu þegar vaskur hópur söltunarfólks rifjaði upp gömul handtök.

Það er einstök upplifun að fylgjast með og láta hrífa sig aftur til horfinna tíma, þar sem lífið var síld og fátt annað komst að.

Þeir sem saman voru komnir við Róaldsbrakka fengu um stutta stund að upplifa þessa stemningu en jafnskjótt og síldin birtist þá var hún horfin aftur.

Síldin lætur nú eingöngu sjá sig á þessum uppákomum sem Síldarminjasafnið stendur fyrir í samstarfi við leikara úr bænum. Síldin er farin í bili og lætur sennilega ekki sjá sig aftur fyrr en á næstu hátíð í bænum.