Skemmtiferðaskip til Siglufjarðar

Skemmtiferðaskipið M/S Caledonian Sky siglir til Siglufjarðar í kvöld og staldrar við fram á miðvikudag. Um borð eru rúmlega 100 farþegar og 73 starfsmenn.

Í kvöld fá farþegar að heyra íslenskar rímur og kveðskap frá kvæðamannafélagi staðarins. Líklegt er að einhverjir fái sér stuttan göngutúr um miðbæinn og skoði sig um.

Í fyrramálið verða gestirnir leiddir um bæinn og bryggjurnar undir leiðsögn. Því næst verður Síldarminjasafnið heimsótt – farþegarnir fá þar að upplifa síldarsöltun, smakka síld og Brennivín og dans á bryggjunni við Róaldsbrakka.

Svo hafa gestirnir frjálsan tíma til að ganga um bæinn og heimsækja gallerí, vinnustofur, kaffihús og veitingastaði fram að brottför. Því eru allir hvattir til að hafa vinnustofur sínar og fyrirtæki opin í kvöld og á morgun.

Texti og mynd: Aðsent