Skemmtleg heimsókn!
Oliver Sacks, rithöfundur, læknir og prófessor í taugalíffræði við NYU School of Medicine heimsótti
Síldarminjasafnið í gær. Oliver er heimsþekktur og hafa verið gerðar bíómyndir eftir bókum hans. Sem dæmi má nefna
kvikmyndina Awakenings, sem byggð var á samnefndri bók hans, en myndin var tilnefnd til Óskarsverðlauna árið 1990. Aðra fræga bók hans
má nefna: The Man Who Mistook His Wife for a Hat.
Oliver býr í New York en er fæddur í Bretlandi þar sem hann er mikils metinn. Árið 2008 veitti Elísabet Bretadrottning honum heiðursorðu
Breska heimsveldisins fyrir framlag hans til læknisfræðinnar.
Oliver hefur þrisvar sinnum áður heimsótt Ísland, en aldrei að vetrarlagi. Aðspurður sagðist hann hafa heyrt af Síldarminjasafninu er hann var
hérlendis í ágúst sl. og ákveðið í kjölfarið að heimsækja landið aftur að vetrarlagi og koma hingað norður.
Þegar hann steig inn úr dyrum Róaldsbrakka þá sagði hann: "I love herring!" Um ástæðu þessarar ástar sagði hann að í
æsku hefði það verið háttur á heimili hans að borða síld sex daga í viku; síld af hinu margvíslegasta tagi.
Og þegar starfsmenn safnsins höfðu áttað sig á manninum og þýðingu síldarinnar í lífi hans var slegið upp
óvæntri og lítt undirbúinni síldarveislu eins og meðfylgjandi mynd sýnir.
Í för með Óliver var Bill Hayes, sem sjálfur er rithöfundur og greinahöfundur fyrir New York Times Hann hefur gefið út þrjár
fræðibækur. Hann hefur einnig verið gestafyrirlesari hjá fjölmörgum virtum háskólum í Bandaríkjunum.
Þessi frétt sem á heimasíðu Síldarminjasafnsins er skrifuð til að sýna
hve óvænt atvik geta hent á hjaranum – jafnvel í hinu „svartasta skammdegi“ þegar allt á að liggja í dvala og
kyrrstöðu.
Ljósmyndina tók J. Pasila (listakona frá New York sem dvelur um þessar mundir í Herhúsinu): Þar er Oliver Sacks til hægri, við hlið hans
sitja Anita og Örlygur starfsfólk safnsins, vinstra megin sitja Atli Ársælsson, Ársæll Arnarsson og Bill Hayes.
Fréttina má einnig lesa á vefsíðu Síldarminjasafnsins
Athugasemdir