Skólaslit Grunnskóla Fjallabyggðar

Skólaslit Grunnskóla Fjallabyggðar fóru fram í annað sinn í Siglufjarðarkirkju föstudaginn 1. júní kl. 17:00. Gaman var að sjá hversu fjölmennt var á kirkjubekkjunum og greinileg spenna var í loftinu, sérstaklega hjá 10. bekkingum sem voru að ljúka sinni skólagöngu.

Mikil fækkun verður í nemendahópnum við útskrift þessa fjölmennasta árgangs skólans, en 42 nemendur voru í 10. bekk í vetur.

Dagskrá var með hefðbundunum hætti; skólastjóri flutti ávarp sem og fulltrúar nemenda, nemendur í 8. og 9. bekk fengu sín einkunnaspjöld afhent út höndum umsjónarkennara, fulltrúar skólans og ýmissa félagasamtaka afhentu viðurkenningar fyrir góðan námsárangur og að lokum fengu 10. bekkingar vitnisburð sinn fyrir starfið í vetur.

Að lokinni athöfn buðu foreldrar nemenda í 10. bekk starfsfólki skólans og nemendum 10. bekkjar til kaffisamsætis í safnaðarheimilinu.



Jónína Magnúsdóttir skólastjóri