Sólarpönnukökur í tilefni dagsins

Ilminn lagði langt út á götu þegar blaðam. Sigló.is heimsótti Sjálfsbjörg félag fatlaðra í morgun, enda var búið að baka á annað þúsund pönnukökur, og hafa konurnar greinilega haft í nógu að snúast við að baka, því flest ef ekki öll fyrirtæki bæjarins, bjóða starfsmönnum sínum uppá pönnsur með kaffinu í dag frá þeim.

Mjög gömul hefð er að drekka sólarkaffi með pönnukökum um allan bæ, á fyrsta sólardaginn sem er í dag 28. janúar, þegar sólin skín um nokkra stund um allan bæ. Í tvo eða þrjá áratugi hafa Sjálfsbjargarfélagar staðið fyrir miklum pönnukökubakstri og sölu til fyritækja og einstaklinga í bænum. Ekki er samt líklegt að sólin láti sjá sig í dag, en hver veit, við erum búin að bíða eftir henni í rúma tvo mánuði.

Kolbrún Símonardóttir sagði mér einnig að það væri alltaf opið hjá þeim frá kl.13-16 hvern virkan dag í viku hverri og kæmu margir að föndra eða bara til að fá félagsskap. Eins er hægt að kaupa marga fallega hluti hjá þeim eins og myndin ber með sér.