Sólstöðuganga

Það var stór og góður hópur sem var mættur á Torgið síðastliðið föstudagskvöld til þess að taka þátt í Sólstöðugöngu Ferðafélags Siglufjarðar. Gengin var leiðin  Mánárdalur – Hvanneyrarskál.

Lagt var af stað uppúr kl. 9 með rútum frá Torginu. keyrt var inn í Mánárdal og gengið var eftir hinni svokölluðu Dalaleið.

Göngufólk fékk frábært veður, logn, sólskin og aðstæður því eins og best verður á kosið til þess að fylgjast með einum lengsta degi ársins líða hjá. 

Þegar komið var upp úr Mánárdalnum var stefnan tekin á Hvanneyrarskálina og síðan haldið sem leið lá niður til Siglufjarðar.  

Ferðin endaði síðan á pallinum hjá fararstjóranum Gesti Hanssyni og Huldu þar sem göngufólki beið dýrindis kjötsúpa. 

Frábær ferð í alla staði og mikil ánægja allra sem tóku þátt.