Iceland Air í Síldarminjasafninu

Á miðvikudag heimsótti hópur sölu-, markaðs- og svæðisstjóra Iceland Air Síldarminjasafnið. Um var að ræða tæplega 30 manns sem komu hingað til Siglufjarðar á vegum Markaðsskrifstofu Norðurlands.

Anita Elefsen, Rósa Margrét Húnadóttir og Örlygur Kristfinnsson tóku á móti hópnum og var kynnt fyrir þeim saga safnsins og staðarins er þau voru leidd um safnhúsin. Hópurinn var afar hrifinn af safninu, sérstaklega vakti síldarstúlkan Bidda Björns. athygli þeirra en hún saltaði fyrir þau á bryggjum Bátahússins, auk þess sem Sigurjón Steinsson lék á nikkuna og myndaði skemmtilega og lifandi stemmningu. Að lokum fengu gestirnir að smakka á rúgbrauði, síld og Brennivínsstaupi áður en haldið var aftur til Akureyrar.

Vert er að taka fram mikilvægi þessarar heimsóknar og annarra sambærilegra fyrir Síldarminjasafnið. Þarna er fólk sem starfar í ferðaþjónustu um allan heim auk þess sem þarna eru einstaklingar sem starfa með skipafélögum og við skipulagningu á komum skemmtiferðaskipa til landsins – en Siglufjörður hefur vakið afar mikla lukku meðal þeirra skipafarþega sem heimsótt hafa staðinn.  -AE

Birna Björnsdóttir að salta síld fyrir gesti

Örlygur að gefa salt

Sigurjón Steinsson

Anita, Örlygur, Birna, Rósa og Sigurjón

Texti: Anita Elefsen

Myndir: GJS