Tímamótasamningur

Þann 14. janúar sl. var endurnýjaður samningur Síldarminjasafns Íslands og menntamálaráðuneytisins frá 2010.

 

Meðal markmiða í starfsemi safnsins er þetta ákvæði: „standa vörð um forna þekkingu á smíði opinna tréskipa hér á landi.“
og:
„Síldarminjasafnið skal standa fyrir námskeiðum og fræðslu um íslenska bátasmíði í samstarfi við önnur söfn og menningarstofnanir,“ 

Þótt ekki sé þetta stór þáttur í samningnum eða að miklum fjármunum sé varið til hans sérstaklega þá má ætla að þetta sé í fyrsta sinn að undirritaður  er opinber samningur um varðveislu bátasmíðaþekkingar, þessarar gömlu verkmenningar sem fylgt hefur Íslendingum allt frá landnámstíð.

Starfsmenn og forráðamenn safnsins líta svo á að með þessu ákvæði samningsins sé safninu sýndur heiður og um leið viðurkenning fyrir viðleitni á undanförnum árum til að viðhalda og hlúa að þessari mikilvægu menningararfleið.

Er það eindreginn vilji og ásetningur að standa við þetta fyrirheit sem í samningnum felst eins og eftirtalin atriði bera vott um:

• Sveitarfélagið Fjallabyggð afhenti á síðasta ári Síldarminjasafninu gamla Slippinn til eignar og nota.

• 1. janúar 2013 var menntaður tréskipasmiður ráðinn til starfa við safnið.

• Að frumkvæði Iðnskólans í Hafnarfirði eru hafnar viðræður um formlegt samstarf við Síldarminjasafnið um tréskipasmiðanám. Yrði þar um að ræða að þróa kennsluefni og að í Slippnum, undir leiðsögn og kennslu tréskipasmiðsins, færi fram verklegur þáttur námsins.

Ljóst er á framansögðu að miklir möguleikar eru fyrir hendi, og ef rétt er á málum haldið, að hér á Siglufirði þróast eitthvað skemmtilegt og spennandi í trébátasmíði landsmanna.
Síldarminjasafnið þakkar bæjarstjórn Fjallabyggðar og menntamálaráðuneytinu fyrir góðan stuðning og samstarf.

Guðmundur Skarphéðinsson, formaður safnstjórnar
Örlygur Kristfinnsson, safnstjóri.

 

sjá einnig vefsíðu Síldarminjasafnsins