Áhugamálið hans Óla Gunnars

Fyrir um 13 árum síðan þurfti Ólafur Gunnarsson sjómaður að taka sér frí frá sjómennsku vegna veikinda.

Óli var nú fremur óvanur að hafa ekki eitthvað fyrir stafni svo honum datt í hug að læra að stoppa upp dýr, sem hann gerir ennþá í frístundum.

Það kom honum verulega á óvart hvað mikið er um það að fólk láti stoppa upp dýr og þá eru það helst fuglar sem verða fyrir valinu og segist Óli vera um tvo daga að vinna verkið.

Stærsta dýrið sem hann hefur stoppað upp er refur, en það minnst er Glókollur sem er minnsti  fugl á Íslandi og hefur tekið sér bólfestu í Skorradal.

Honum er fleira til lista lagt því hann hefur einnig fengist við að mála og sker út í tré. Það má því með sanni segja að Óli sitji aldrei auðum höndum.