Fánaborg við Þjóðlagasetur séra Bjarna Þorsteinssonar

Nú er rétt rúm vika þar til Þjóðlagahátíðin á Siglufirði hefst. Norðurlandafánarnir eru dregnir að húni dag hvern klukkan 13.00 við Þjóðlagasetrið.
Reyndar vantar Finnska fánann í safnið og er hér með auglýst eftir honum. Margt fólk hefur lagt leið sína í safnið síðustu vikurnar og eru brottfluttir Siglfirðingar duglegir að sækja safnið heim. Frakkar, Þjóðverjar, Austurríkismenn og Kanadamenn hafa einnig komið í heimsókn í sumar. Vert er að benda á að nýtt efni er nú á boðstólnum, svo sem myndband um ævi og störf séra Bjarna Þorsteinssonar og myndbönd með Steindóri Andersen og Ólínu Þorvarðardóttur þar sem þau kveða og syngja.
Safnið er opið alla daga vikunnar frá kl. 13.00 – 17.00 og eru dýrindis kleinur og ástarpungar á boðstólnum fyrir gesti og gangandi. Heimasíða Þjóðlagaseturs séra Bjarna Þorsteinssonar HÉR