Námskeið í Íslenskri þjóðartónlist

Þann 12. febrúar hefst tveggja vikna Þjóðlaga námskeið sem Bára Grímsdóttir og Chris Foster halda á vegum Listaháskóla Íslands. 16 nemendur við tónlistardeild Listaháskólans hafa skráð sig á námskeiðið. Megin hluti námskeiðsins verður haldin helgina 13. – 15. febrúar  á Hólum í Hjaltadal og á Siglufirði.
Þjóðlaganámskeiðið byggist á að kynna fyrir nemendum íslenska, enska, írska og skoska þjóðlagatónlist og hvar þeir geta leitað frumheimilda. Nemendur verða virkir í söng og hljóðfæraleik og læra lögin sem mest eftir heyrn þó eitthvað verði þó líka stuðst við nótur. Gestakennari á námskeiðinu er Mharhi Baird, flautu, mandolín og banjoleikari frá Skotlandi. Hún mun kenna skosk og írsk þjóðlög á opnu námskeiði í Auðunnarstofu á Hólum föstudaginn kl. 19.00. Allir eru velkominr meðan húsrúm leifir. Á laugardagsmorgni munu nemendur heimsækja söfnin á Siglufirði,  vinna og safna heimildum og lögum á Þjóðlagasetri sr. Bjarna Þorsteinssonar. Eftir hádegið munu þeir vinna nánar með lögin, útsetja og æfa í hópum í Tónlistarskóla Siglufjarðar. Á sunnudagsmorgni, verður fyrirlestur í Auðunnarstofu um sálma og tónlistar og prentsögu staðarins. Síðan munu nemendur taka þátt í messu á Hólum kl. 14.00. Lokapunktur námskeiðsins eru tónleikar í Listaháskólanum þar sem nemendur leika sínar eigin útsetningar á þjóðlögum. Bára Grímsdóttir er tónskáld og söngkona. Hún hefur flutt íslensk þjóðlög um árabil, en er einnig vel þekkt hér á landi fyrir kórtónlist sína. Hún ólst upp á óðali ættar sinnar Grímstungu í Vatnsdal við söng og kveðskap foreldra sinna og afa og ömmu. Hún hefur komið fram víða hér heima, í Evrópu og Norður Ameríku með Sigurði Rúnari Jónssyni og Njáli Sigurðssyni, enog einnig sem meðlimur hópsins Emblu sem hún tók þátt í að stofna.
Chris Foster kemur frá suð - vestur Englandi. Hann er snillingur á sínu sviði, nýverið lýst sem:  “einn af bestu söngvurum og gítarleikurum  sem sprottið hafa upp úr enska þjóðlagatónlistar geiranum á sjöunda áratugnum”. Hann hefur spilað víða um Bretlandseyjar, í Evrópu og Norður- Ameríku. Chris hefur gefið út sex sóló plötur og tekið þátt í útgáfu margra annara með öðrum listamönnum.
Bára og Chris hafa unnið saman sem tvíeykið Funi síðan árið 2001. Þau flytja bland af enskum og íslenskum þjóðlögum, syngja  og leika undir á gítar, kantele,  íslenska fiðlu og langspil. Bára og Chris, ásamt John Kirkpatric, gáfu út geisladiskinn Funa árið 2004 og hlaut sá diskur mikið lof gagnrínanda. Undanfarin sjö ár hafa þau spilað saman á tónleikum og hátíðum í Írlandi, Hollandi, Belgíu, Ungverjalandi, Bandaríkjunum og Kína sem og  víða á Bretlandseyjum og Íslandi.

Guðrún Ingimundardóttir.