Ríkið að þurrka út sparisjóðakerfið?

Allt stefnir í að 7. grein í frumvarpi að lögum um fjármálafyrirtæki breytist ekki og frumvarpið verður afgreitt úr viðskiptanefnd Alþingis á morgun. Í 7. grein segir að ríkið verði eini eigandinn í sparisjóðum. „Þannig að menn eru að gera ráð fyrir því í einhverjum tilvikum að ríkið geti þurft að skrifa niður allt stofnfé að þeirra mati,“ segir Eygló Harðardóttir, þingmaður Framsóknarflokksins í Suðurkjördæmi, en hún situr í viðskiptanefnd Alþingis.
Eygló segir minnihlutann í nefndinni reyna að fá ákvæðinu breytt en hún segir meirihluta nefndarinnar ekki viljugan til þess. „Maður skilur eiginlega ekki þetta frumvarp eins og það er núna. Þetta verður lögleysa að mínu mati og það er spurning hvort vinstri flokkarnir séu að leggja til að leggja niður sparisjóðakerfið á Íslandi,“ segir Eygló.

Hún segir sveitarfélög eiga stóran hlut í sparisjóðum og tekur sem dæmi Sparisjóðinn í Keflavík þar sem sveitarfélög eiga drjúgan hlut í sjóðnum. „Það eru um sjö hundruð milljónir króna bundnar í stofnfé í Sparisjóðnum í Keflavík sem sveitarfélög hafa lagt til. Súðavíkurhreppur á stofnfé í sjóðnum og ég veit ekki hvort sveitarfélagið standi undir því ef stofnfé þess verður skrifað niður algjörlega,“ segir Eygló. Um sjö hundruð milljónir króna eru í stofnféi í Sparisjóð Bolungarvíkur og það hefur aldrei verið framselt að sögn Eyglóar. „Þeir áttu engan hlut í Exista eða Kaupþingi og menn fóru fyrst og fremst í stofnfjáraukningu til að styðja við sjávarútvegsfyrirtækjum, en það virðist vera lítill skilningur með fjármálafyrirtækjum á landsbyggðinni,“ segir Eygló.

Hún segir vinstri flokkana bera fyrir sig jafnræði þegar kemur að 7. greininni. „Þeir sem áttu hlutafé í öðrum fyrirtækjum töpuðu öllu sínu og þar með eigi það sama að gilda um stofnfjáreigendur og eru algjörlega að hunsa að það er grundvallarmunur á hugtakinu hlutafé og stofnfé. Eins og lögin eru núna þá er ekki heimilt að lækka stofnfé og fólk sem tók þátt í stofnfjáraukningu á síðustu árum gerði það út frá þessum lögum. Mér finnst þetta þurfa að skoðast út frá eignaréttarákvæðinu í stjórnarskránni hvort verið sé að taka frá fólki hreina og klára eign með þessari lagabreytingu,“ segir Eygló.

Hún segir stofnfé upprunalega hafa verið skilgreint sem bundið innlán og fólk fengið vexti af því en ekki arð. Því hafi verið breytt fyrir einhverjum árum síðan og þá fóru þær að kallast arðgreiðslur. „Þessu var svo breytt og þá mátti borga út arð þó að tap væri á rekstri sparisjóðanna, alveg eins og önnur innlán þá borgar maður vexti þó að tap sé á rekstrinum.

birgir@bb.is