Að finna sjálfan sig

Lífið á Siglufirði einskorðast ekki aðeins við fast land og Siglufjörð sjálfan. Siglfirðinga er víða að finna og eru þeir til að mynda margir sem sækja sjóinn umhverfis landið.

Áhöfnin á Siglunesi SI-70 stendur í ströngu þessa dagana við rækjuveiðar, en skipverjar gefa sér þó tíma til þess að njóta lífsins og sjá spaugilegu hliðarnar á tilverunni.

Skipstjórinn á Siglunesinu, Pétur Bjarnason hafði samband við fréttamann siglo.is og sendi þessa skemmtilegu mynd af lífinu um borð.

Það eru mörg dæmi þess að menn taka sé frí frá sínu "venjulega" lífi og skelli sér á sjó til þess að breyta aðeins til í lífinu, jafnvel reyna að enduruppgötva sjálfan sig.

Einn slíkur er nú kokkur um borð á Siglunesinu, en það þekkja sennilega flestir hann í öðru hlutverki en matreiðslu á rækjuveiðiskipi.

Á myndinni má sjá hann í fullum skrúða að leita að mataruppskriftum á internetinu.

Hvort hann hafi fundið sjálfan sig í leiðinni er svo annað mál en maturinn um borð er víst með eindæmum ljúffengur.