Bensínverð hækkar og hækkar

Heimsmarkaðsverð á olíu hefur ekki verið hærra í tvö ár og kostar tunnan nú tæpa 98 bandaríkjadali.
Óróinn í Norður -Afríku er helsti drifkraftur hækkananna nú og hafa olíufélögin hér heima hækkað verð á eldsneyti vegna þessa.
Þá hafa auknar álögur ríkissjóðs á hvern seldan bensínlítra einnig haft áhrif til hækkunar bensínverðs hér á landi. Lítrinn hefur aldrei kostað meira, en lægst fæst lírinn á 221 krónu og 50 aura.

Þegar verðþróun á bensíni er skoðað kemur í ljós að á fimm árum hefur verðið á bensínlítranum hækkað um rúm 90 prósent en lítrinn kostaði rúmar 115 krónur í janúar 2006.

Sé miðað við meðalakstur á heimilisbílnum sé 15 þúsund kílómetrar á ári og að bílinn eyði 10 lítrum á hundraði sést betur hvaða áhrif þessar hækkanir hafa haft á pyngju landsmanna. Þegar lítrinn kostaði rúmar 115 krónur fóru ríflega 173 þúsund krónur í bensín á bílinn á ári en nú kostar sami akstur tæpar 333 þúsund krónur á ári. Munar þar tæpum 160 þúsund krónum á ári eða um 10 þúsund krónur á mánuði.

Ekkert bendir til þess að heimsmarkaðsverð á olíu muni fara lækkandi á næstunni. Markaðurinn hefur enn ekki náð jafnvægi og ótryggt stjórnmálaástand í Líbíu, sem ekki sér fyrir endan á, hefur hækkað heimsmarkaðsverð á olíu enn frekar.