Fersk egg á hverjum degi

Fréttir

Fersk egg á hverjum degi

Ásta Júlía Kristjánsdóttir og Hálfdán Sveinsson halda litskrúðug hænsni, sér og öðrum til skemmtunar, í garði sínum við Lindargötu. Það er ekki amalegt að geta sótt ný egg í hænsnakofann í bakgarðinum á hverjum degi, en að meðaltali fá þau sex fersk egg. Hálfdán hleypir sjö hænunum og einum hana út úr kofanum á morgnana, og er hersingin úti allan daginn á vappi í garðinum. Hænsnin eiga það til að laumast yfir í garða nágrannanna en Rannveig Pálsdóttir (Ranna) sem býr við Hverfisgötu hafði einmitt á orði að henni þætti afar vinalega að fá þær í heimsókn. Hænsnin haga sér eins og þægir unglingar, þ.e. þær skila sér alltaf heim á tilsettum tíma, enda hreinræktaðar íslenskar landnámshænur! Íslenska landnámshænan er minni en margar aðrar hænutegundir en á móti kemur að hún er harðger og dugleg og það má hugsa sér að þessi persónueinkenni hafi mótast í baráttu við óblíð náttúruöfl Íslands. Íslenskt, já takk!
Eigenda- og ræktendafélag landmámshæna