Frábærir tónleikar í Bátahúsinu

Boðið var upp á frábæra tónleika í Bátahúsinu í gærkvöldi með Spænska kórnum POLIFONICA DE PUIG-REIG frá Katalóníu. Á ferð sinni um Ísland heldur kórinn tónleika í Hörpunni, Hofi og Bátahúsinu á Siglufirði.

Um sjötíu manns sóttu tónleikana. Kórinn var klappaður upp og söng lokalagið á bryggjunni. Kórinn er greinilega á heimsmælikvarða hvort heldur sem hlustað er eða skoðuð ferilskrá hans um jarðarkringluna. Þarna mátti heyra  fallegan og kröftugan samhljóm í fjölbreytilegum lögum og síðan stigu fram sex einsöngvarar sem sungu hver öðrum glæsilegar.

Okkur íbúum Fjallabyggðar var mikill heiður sýndur með þessum tónleikum þar sem Bátahúsið var sérstaklega valið auk Hörpunnar og Hofsins. Í kvöld verða stórtónleikar í Hofi í tilefni 150 ára afmælis Akureyrar þar sem meðal annarra bæjarstjórnendur og forseti Íslands munu sýna þessu frábæra spænska tónlistarfólki virðingu með nærveru sinni.





















Texti og myndir: GJS