Fundur um framtíð Náttúrugripasafnsins í Fjallabygg

Opinn fundur um framtíð Náttúrugripasafnsins var haldinn fimmtudaginn 5. maí sl.. Fundurinn var vel sóttur og alls mættu um 35 manns. Karítas Skarphéðinsdóttir Neff fræðslu- og menningarfulltrúi fór yfir stöðuna á safninu í dag og kynnti framtíðarhugmyndir.

Til þess að þær geti orðið að veruleika og hægt að byggja upp Náttúrufræðisetur þarf safnið að komast í stærra húsnæði á jarðhæð en núverandi staðsetning er á 3. hæð í húsi Sparisjóðs Ólafsfjarðar.

Á fundinum komu fram margar góðar hugmyndir og greinilegt er að íbúum stendur ekki á sama um safnið. Fundarmenn voru sammála um að gera þyrfti stórt átak í húsnæðismálum safnsins og uppbyggingu. Gera þarf safnið nútímalegt, fjölskylduvænt og fjölbreytilegt. Þá buðu sig fram einstaklingar í undirbúningsnefnd til að vinna að málum safnsins. Þeir eru eftirfarandi:

Þorsteinn Ásgeirsson, Magnús Sveinsson, Guðrún Þórisdóttir og Jón Dýrfjörð.