Fyrsta landsmót kvæðamanna - Siglufirði 1. - 3. mars

Steindór Andersen

Kvæðamannamótið 2013 verður hið fyrsta Landsmót kvæðamanna.
Föstudagskvöldið 1. mars mun hinn heimsþekkti kvæðamaður Steindór Andersen halda tónleika í Rauðku á Siglufirði.  Á laugardeginum verður Steindór með  rímnalaganámskeið, en einnig verður boðið upp á námskeið um bragfræði, vísnagerð og tvísöngva. Hápunktur mótins verður glæsilegur kvöldverður og kvöldvaka þar sem kvæðamenn og kvæðakonur "kveða í kútinn."

Mikilvægur þáttur í þessu fyrsta Landsmóti kvæðamanna er að stofna Landssamtök kvæðamanna til að styrkja kvæðamannafélögin og gera kvæðamennskuna að lifandi tónlistarhefð.