Fyrsti sólardagur ársins á Siglufirði í dag

Fyrsti sólardagur á Siglufirði er haldinn hátíðlegur í dag.

 

Í dag á sólin að sjást á Siglufirði í fyrsta skiptið síðan 15. nóvember ef þannig viðrar.

 

Í heimildum sem ég fann á netinu segir að það hafi verið vafamál hvort síðasti sólardagur væri 14. eða 15. nóvember. Einnig vilja sumir meina að fyrsti sólardagurinn sé 27. janúar því þá á sólin að sjást fyrst á prestssetrinu. En hvað sem því líður þá er haldið upp á sólardaginn í dag 28. janúar og flest allir ef ekki allir fá sér pönnuköku í tilefni dagsins.

 

Til fjölda ára hafa sólarpönnukökur verið á borðum á þessum degi á Sigló og vafalaust verður þetta ekkert öðruvísi núna.

 

Ég hef heyrt að hér áður fyrr hafi verið algengt og jafnvel algengara að bakaðar hafi verið sólar-lummur. Það væri gaman ef þið hafið einhverjar nánari útskýringar á því. En þetta er að sjálfsögðu bara eitthvað sem ég hef heyrt .