Gréta Salóme Stefánsdóttir fiðluleikari

Gréta Salóme Stefánsdóttir fiðluleikari, söngkona og tónskáld hefur heldur betur slegið í gegn í Eurovisin undankeppninni eins og tæpast hefur farið fram hjá þeim sem fylgist með henni, en það eru ekki allir sem vita að hún er ættuð frá Siglufirði.

Hún á ekki langt að sækja tónlistargáfuna því hún er dóttir Kristínar Lillendahl sem sló í gegn með hinu ljúfa og notalega lagi “Ég skal mála allan heiminn elsku mamma” árið 1973 og kom þá til Siglufjarðar þar sem hún flutti lagið á kvöldvöku sem haldin var í tengslum við skíðalandsmótið um páskana sama ár. Kristín er dóttir Karls og Hermínu Jónasdóttur Lilliendahl, en Hermína er dóttir Jónasar Halldórssonar rakara og Kristínar Steingrímsdóttur á Siglufirði.

Þær mæðgur Gréta og Kristín hafa svolítið unnið saman því Krístín á m.a. textann við ágætt lag dóttur sinnar “Vor”
http://www.youtube.com/watch?v=LeVy-9IlSU8

Gréta hóf tónlistarnám árið 1991 þá aðeins fimm ára gömul, en hefur nú lokið BA gráðu í fiðluleik frá Listaháskóla Íslands og hóf meistaranám í Sköpun, miðlun og frumkvöðlastarfi árið 2010 við sama skóla. Ásamt meistaranáminu í LHÍ leikur Gréta með Sinfóníuhljómsveit Íslands og starfar í sjálfstæðum verkefnum. Lag hennar “Betlehem” var valið jólalag ársins á Rás 2 árið 2008.

Samantekt: Leó R. Ólason.