Gjörningur í fjöru

Innsend grein frá Örlygi.

Gjörningur í fjöru

Margvíslegir  listgjörningar fóru fram víða um bæ nú á dögunum þegar fagurlistadeild Myndlistaskólans á Akureyri var hér í vikulöngu námi hjá Öllu Siggu, Aðalheiði S. Eysteinsdóttur, í Alþýðuhúsinu – og var það hluti af fjögurra vikna námskeiði hennar.

Við, vegfarendur, urðum margir steinhissa á uppátækjum fólksins og lái okkur það enginn; okkur sem ungum var kennt að ekki sé önnur fögur list en innrammað „Hólshyrnumálverk“ á stofuvegg! 

Undirritaður fylgdist með tveimur gjörningum listafólksins um daginn. Sá seinni var mjög áhrifarík athöfn í síðdegismyrkri úti í Hvanneyrarkrók til minningar um þá sem villst höfðu af leið og horfið.

Horfið í hafið.

Hlaðin var varða (varðan vísar réttan veg) – og á toppi hennar var tendraður logi á stóru kerti. Síðan var athöfnin fólgin í því að hver og einn viðstaddra tók sér steinvölu í hönd og hvíslaði að henni kveðju og lagði í vörðuna – einnig lítið kerti í glufu. Þannig týrðu kertaljósin um stund uns sunnangjóla slökkti á þeim og toppkertið eitt flökti í myrkrinu.  Ekkert var sagt og þögn ríkti. Utan frá hafinu bárust öldurnar og léku sitt hlutverk. Féllu ýmist  að fjöruborðinu með mjúku gjálfri eða þær risu hver á fætur annarri, brotnuðu  með þungum dynk og slengdu hvítu löðri eins og ógnandi upp í sandinn.

Að hálfri stundu liðinni lauk þessari dimmu og áhrifamiklu samveru og allir gengu örugga leið heim.

-ÖK

Ásmundur leggur fyrsta litla kertið inn.

Nokkrum dögum síðar hafði aldan grafið undan vörðunni.

Og svo myndir frá öðrum gjörningum hópsins.