Glæsilegt gengi á UFA mótinu á sunnudaginn

Fréttir

Glæsilegt gengi á UFA mótinu á sunnudaginn

Drengirnir kampakátir eftir magnað boðhlaup

Það gekk mjög vel hjá keppendum okkar á UFA mótinu sem fór fram í Boganum á Akureyri 15. apríl. 9 krakkar tóku þátt frá Glóa, en alls voru um 120 keppendur skráðir til leiks í frjálsíþróttakeppninni.

Okkar fólk varð í verðlaunasætum í 21 grein af 50 sem það tók þátt í og margir bættu afrek sín verulega. 12 siglfirsk aldursflokkamet féllu og 1 félagsmet var sett en það var í 4 x 200 metra boðhlaupi, en þar áttu drengirnir í 12-13 ára flokknum frábært hlaup og báru sigurorð af Skagfirðingum með nokkrum yfirburðum.

Björgvin Daði Sigurbergsson var í svakalegu formi, keppti í 8 greinum og vann þær allar, flestar með töluverðum yfirburðum. Hann setti 4 siglfirsk aldursflokkamet í flokki 13-14 ára og er meðal 5 efstu á landinu í sínum aldursflokki í flestum þeim greinum sem hann keppti í. Vakti hann mikla athygli á mótinu fyrir frammistöðuna.

Patrekur Þórarinsson var í fínu formi líka og setti 3 siglfirsk aldursflokkamet í flokki 15-16 ára. Hann sigraði í hástökki, varð annar í 600 metra hlaupi og þriðji í kúlu og 60 metra grindahlaupi.

Hjörvar Már Aðalsteinsson varð í þriðja sæti í 5 greinum af þeim 8 sem hann keppti í og setti 1 siglfirskt aldursflokkamet í flokki 11-12 ára. Hann er á yngra ári í sínum flokki og árangur hans því mjög góður.

Atli Örn Sævarsson og Guðmundur Árni Andrésson kepptu báðir í nokkrum greinum í flokki 12-13 ára og stóðu sig mjög vel, bættu afrek sín í nokkrum þessara greina og áttu mjög góða spretti í boðhlaupinu. Atli náði best fimmta sæti í 60 metra hlaupi og Guðmundur best fjórða sæti í 600 metra hlaupi.

Elín Helga Þórarinsdóttir keppti í fjórum greinum og stóð sig mjög vel. Hún er á yngra ári í sínum flokki og náði best 3. sæti í skutlukasti og 4. sæti í 60 metra grindahlaupi.

Joachim Birgir Andersen var að keppa á sínu fyrsta stóra móti og stóð sig virkilega vel. Hann er á yngra ári í flokki 10-11 ára en blandaði sér samt sem áður í toppbaráttuna í nokkrum greinum. Hann náði best 2. sæti í hástökki þar sem hann kom mjög á óvart og vippaði sér yfir 1.10 metra. Joachim á nú siglfirskt aldursflokkamet í 60 metra grindahlaupi hjá 10 ára og yngri, hann er sá fyrsti sem hefur hlaupið þá vegalengd í þeim aldursflokki.

Unnur Hrefna Elínardóttir var einnig að keppa á sínu fyrsta stóra móti og var frammistaða hennar til fyrirmyndar. Hún keppti í sex greinum og gerði sér lítið fyrir og náði 2. sæti í hástökki og einnig gekk henni mjög vel í 60 metra grindahlaupi þar sem hún varð í 4. sæti. Hún á nú tvö siglfirsk aldursflokkamet því hún var sú fyrsta til að keppa í þeim greinum hjá 10 ára og yngri.

Sigurjón Sigtryggsson er síðastur en ekki sístur í þessari upptalningu. Hann stóð sig mjög vel að vanda, keppti í þremur greinum og sigraði í einni þeirra; 600 metra hlaupi þar sem hann skeiðaði af miklu öryggi lang fyrstur í mark.