Guðni segir af sér þingmennsku

Guðni Ágústsson hefur sagt af sér þingmennsku og var bréf þessa efnis lesið upp í upphafi þingfundar á Alþingi í dag. Engar skýringar komu fram í bréfinu en þar sagðist Guðni láta í ljósi einlæga von um að þjóðinni takist að sigrast á þeim erfiðleikum, sem nú steðja að. Guðni hefur jafnframt sagt af sér sem formaður Framsóknarflokksins og hefur sent bréf til þingmanna Framsóknarflokksins. Guðni hefur átt fast sæti á Alþingi frá árinu 1987, fyrst fyrir Suðurlandskjördæmi en síðan fyrir Suðurkjördæmi, en var áður varaþingmaður. Hann hefur verið formaður Framsóknarflokksins frá því á síðasta ári. Þá var hann landbúnaðarráðherra á árunum 1999 til 2007.