Hraðahindranir í felulitum

Það er ekki ofsagt að brýn þörf er á úrbótum á merkingum hraðahindrana á götum Siglufjarðar eins og meðfylgjandi myndir sýna glöggt.




Sennilega kemur “merkingarleysið” þó síst við þá sem búa á staðnum og eru e.t.v. búnir að kynnast vandamálinu af eigin raun og því einnig búnir að leggja vel á minnið hvar helst þarf að gæta sín. Einhver myndi vilja benda á að hindranirnar séu þarna til þess að ökumenn haldi sig innan hraðatakmakanna sem er auðvitað tilgangurinn, en það er samt ekkert grín að aka yfir margar þeirra á aðeins 35. km. hraða á öðrum ökutækjum en fólksbílum með góða fjöðrun og dempara í topplagi.

Iðnaðarmaður nokkur fór á dögunum yfir hraðahindrun á Suðurgötu á sendibíl sínum, sem var fulllestaður af verkfærum og byggingarefni, með öllu grunlaus um hvað hann átti í vændum. Engum togum skipti að þegar ekið var yfir hina ómerktu hindrun, hóf allt sem í bílnum var sig “til flugs” og þegar það lenti aftur með miklum gauragangi, var engu líkara en bíllinn hefði farið eins og eina veltu eða svo.